Blogarkivoj

Kiel Malkovri Italajn Arturbojn Bicikle

Emiljo-Romanjo bicikle

Itala regiono Emiljo-Romanjo malfermas pordojn de 5 urboj plenaj de belegaj artaĵoj antaŭ viaj fortaj kruroj kaj GPS -navigilo.  Elektu kie vi emas bicikli, ĉu plenmontare en Apenino aŭ ĉe la Adriatika marbordo, kaj kion vi ŝatus trafi, ĉu antikajn urbetojn, kamparon aŭ arbarojn. Krom alŝuteblaj direkte vojaĝlibretoj kaj GPS-dosieroj, ĉe la paĝaro facile troveblas kutimaj utilaj informoj: kie tranokti, kie ripari la biciklon, kie manĝi, kie retumi…  

CyclE-R estas nova kreema projekto de urb- kaj provinc-estraroj de Faenza, Ferrara, Forlì-Cesena, Modena kaj Raveno, kiuj antaŭe jam prizorgis alian interesan multlingvan paĝaron Città d’arte pri la samaj arturboj. Do bonvenon!

NOTO: por la plej vojaĝemaj direkten al Italio, post 2 semajnoj oni MJS-umas en Piemonto. Pliaj informoj ĉi-tie.

La Nederlanda Biciklo

Sveda artisto kaj projektisto Anders Jakobsen, ankaŭ konata kiel Lagombra, kreis biciklan rollercoaster por MU Art Foundation en Eindhoven, Nederlando, okaze de la ĵus finita ekspozicio “La Nederlanda Biciklo“. Konstruita de kruda ligno kaj per simpla ĉensegilo, la instalaĵo similis al onda serio de faligitaj domenlud-pecoj. Kun timegaj turnoj kaj alta pinto je preskaŭ du metroj, la mallarĝa instalaĵo estis malferma al iu ajn kiu volis riski vivon – aŭ korpoparton – en rava rajdo. (Laŭ la MU-a direktoro, nur unu riskemulo sukcesis kompletigi la cirkviton.) La ekspozicio celis montri kiel ĉi tiu ordinara objekto restas kerna temo de esploroj, desegno, kaj kreiva esprimo.

Sakoj Por Mesaĝistoj

La nova Commuter Messenger Bag estas praktika sako kiu travivos vian moveman vivon dum multaj jaroj. Konstruita por rezisti pluvon kaj la rigorecon de biciklaj mesaĝistoj (samkiel Timbuk2), ĝi certe honoros la elspezitan monon. Kun tiom da poŝoj, bukloj kaj maŝoj, ĉi tiu ŝultra sako konformiĝos kun preskaŭ ĉio en viaj malmolaj, laboraj tagoj. Kun granda malantaŭa poŝo kun sekcioj por interalie poŝtelefono, la sako proponas facilan aliron al viaj aparatoj; interne, ekzistas dekroĉebla parto por portebla komputilo. Vi povas elekti diversajn kolorojn, kaj eĉ versiojn el reuzitaj plastaj boteloj. Prezoj startas je $160 por malgranda sako kaj $180 por mezgranda en la retejo de Rickshaw.

Donu Duan Vivon Al Via Biciklo

Ĉu vi iam pensis kiel mortas bicikloj kaj kie ĝi entombiĝas? Ĉu ne eblas revivigi sian du-radian amikon? Respondo de Andy Greg estas “Jes, eblas”. Nun bicikloj rajtas ricevi novan vivon en novaj formoj kaj funkcioj: transformitaj en seĝoj, skabeloj, benkoj kaj kafo-tabletoj. Ĉio tio danke al metiejo Bike Forniture el Michigan (Usono), vera juvelejo de kreema reuzo. Por produkti (aŭ pli karese krei, ĉu ne?) ilin, oni elprenas restaĵojn de biciklaj radoj, kaj kovras la aluminian skeleton je gomaĵa aŭ leda tego. La fondinto de la metiejo, mem fervora biciklisto, diras ke la ideo de Bike Forniture venis al li pro malŝato vidi grandan kvanton de biciklojn apud strataj rubujoj.