Author Archives: musubana

Printu Per Kafo

11

Imagu tion: vi devas skribi malfacilan raporton. Por koncentriĝo vi preparas iom da kafo. Antaŭ la komputilo vi lante trinkas la kafon, dum vi per fingroj kaj vekiĝanta cerbo solvas la taskon. Poste – vi malplenigas la kafofiltron en la inkujon de via printilo. Vi komencas ŝovi la inkujon dekstren kaj liven permane. Iom post iom aperas papero kun via raporto, presita tute per postkafaĵo kaj manforto…

Tio povas nun iĝi veraĵo dank’al invento de Jeon Hwan Ju, kiu fasonis la naturamikan printilon RITI por dizajnokonkurso. Laŭ onia scio ĝi ankoraŭ ne amasproduktiĝis, sed espereble la kafprintilo iam estos vendata… Kaj se vi teemas, neniu problemo: RITI ankaŭ povas uzi eluzitajn tefoliojn kiel inkon… Ĉu taŭga ilo por moderna gufujo?

[fonto: interalie http://is.gd/iihX]

Ekmuziken per fizy!

Ĉu la plej facila maniero trovi – kaj aŭskultigi! – retan muzikon ĝis nun?

Iru al

http://fizy.com/

kaj entajpu kion ajn   ··{](^_^)[}··

[titolon kaŭ artiston kaŭ…]

Ĉu vi sukcesas diskĵokeili ankaŭ je Esperanta muziko? Dividu kun ni viajn trovojn en la komentopaĝo…

SMS-i Espe…

cxu tro retro-e?

cxu tro retro-e?

Ĵus havinte la oportunon sendi multajn tekstmesaĝojn en Espo, mi eksentis ĝenan mankon de nialingvaj SMS-mallongigoj. Jes, verŝajne la tuta mondo baldaŭ havos porteblajn unikodajn retpoŝtilojn… Sed lasu min resti en la retro-mojosemo… :-)

Preskaŭ ĉiu konas Anglalingvajn SMS-mallongigojn kiel ”I O U” [aj oŭ ju] ’mi ŝuldas al vi’, ”LOL” = ”laughing out loud” ’ridegas’, aŭ ”hi m8” [haj mejt] ’hej amiko’. Frazmallongigoj de la LOL-speco certe fiaskos E-uje, ĉar… mankas uzantoj! Kiom ofte vi mem tekstmesaĝis Esperante, kaj kun kiom da homoj? Mi povus inventi miajn proprajn (ekz-e TBA ”tre bone, amiko!”), sed estus malfacile disvastigi ilin ekster limigita amikaro. La Anglalingvaj mallongigoj sukcesis ĉar milionoj da homoj enmensigis ilin.

Male, mallongigoj de la I O U-speco (oni uzas la prononcon de la simboloj) certe eblus ĉe ni. Kaj tre oftaj vortetoj kiel ”ne”, ”kaj” kaj ”vi” eblus kurtigi.

n tro aw2 kion diras via pa3no!

Antaŭ kelkaj jaroj mi ekhavis la ideon uzi majusklajn literojn (ABC ktp.) laŭ ties memstara prononco, do MJse = mo-jo-se. (vera ribelulo kompreneble neniam majuskligas laŭregule!) ”@” jam havas la pronocon ”ĉe”, kaj diversajn oftajn ideogramojn poŝtelefonajn ($, € k.a.) oni eble povus uzi simile aŭ iele.

a@tu viNn!

Ĉu ’stus mojose aŭ infanece uzi apartan signon por fina ”-as”? kion v pns$?

k kion pri l Vrt& ”cxu”? c maks-e kurtigi gxn? ¿entute uzi?

,entu v!

Kreu Tekstan Arton per Wordle

’Chu vi pretas ?!’ pretis por Wordle…

’Chu vi pretas ?!’ pretiĝis per Wordle…

La ĉi-supra afiŝo aspektas sufiĉe mojosa, ĉu ne? Eble vi rekonas pri kio temas: la iama furorkanto ”Chu vi pretas” far Dolcxamar. La vortoj grandas laŭ ofteco en la origina teksto. (Tre oftaj vortetoj [’vi’ k.a.] estas intence forigitaj.)

La artaĵo kreiĝis per la interreta programo Wordle (’Vortjo’), kiu troviĝas je http://www.wordle.net/ . Per ĝi ĉiu facile povas krei mojosajn vortartaĵojn – nur necesas ia teksto, retkonekto kaj Java-hava foliumilo.

Ĉu vi volas esti fama?

En la epoko de interreto facilas famiĝi… Simple kreu paĝon pri vi mem. Poste… amasguglu vian nomon, je ĉiu libera horo. Per iomego da peno vi baldaŭ trovos vin en la listo de furorserĉoj!

Ĉu vi volas esti fama?

Ĉu vi volas esti fama?

Se vi tro pigras por tiom da klakado – igu la retajn ĵurnalistojn fari la laboron por vi! Post kiam via nomo ricevis sufiĉe da (interretaj) mencioj, via (interreta) famo certos… Kompreneble, vi devos unue eksterordinare elstari iel, ekzemple arte aŭ politike. Prefere vi akiru la potencon super via ŝtato.

Hispana retejo http://www.lalistawip.com publikigadas listojn de la WIP – Web Important Persons ’TTTre Gravaj Personoj’. Alivorte, listo de la retaj plejmenciatuloj.

Vidu la 100 plej famajn entute (Top Wip 100), aŭ vidu famulojn laŭ landoj (Países) aŭ kategorioj (Categorías). Por fifamuloj – elektu la kategorion Lista negra ’Nigra listo’. Bedaŭrinde mankas kategorio por famaj esperantistoj.

Do, ekigu la laboron, kaj eble iun tagon La Lista Wip trovos Vin…

Usona Libro Rakontas La Historion De Mojoseco

Kio fakte estas “mojoseco”? Ĉu vi rekonas mojosaĵon je la unua okulumo, aŭ ĉu vi havas nur svagan impreson surbaze de holivudaj filmoj? Nu, kleriĝu!


Browse Inside this book
Get this for your site

En la libro Hip: The History (”Hipeco – la historio”) el 2005, John Leland el Usono retroesploras la padojn de la Usona popkulturo. Per surprizaj devojiĝoj tra muziko, filmo, krimo kaj famulismo li malkovras la radikojn de unike Usona nocio: la ‘hipeco’. Ĝi ekestis jam en la tagoj de sklaveco, kiam Afrikidaj sklavoj por konservi sian dignecon apud la Eŭropidaj majstroj devis uzi kvazaŭ sekretajn kodojn – supozeble, hip eĉ devenas el la Volofa lingvo: hepi ’vidi’ aŭ hipi ’malfermi siajn okulojn’. Nu jes, ”hipa” kaj ”mojosa” ne estas la sama afero, sed kvazaŭ kuzoj. Maljuna ĵazisto kun sufiĉe eksmoda vestaro povas esti tute hipa… Dependas de la sinteno, de la agado antaŭ alies okuloj. Legu la libron kaj mojose plihipiĝu! B-)