Vojaĝado « Mojose

Virtuale Sur La Turo Eiffel

Oktobro 23, 2009 at 3:52 ptm | In Vojaĝado | Leave a Comment
Tags: eiffel, paris, parizo

Nun vi povas virtuale viziti la turon Eiffel el la komforto de via domo. Simple sekvu la ligon http://photo.photojpl.com/tour/08toureiffel/08toureiffel.html kaj moviĝu per via muso. Poste, alklalu la dekstran fenestreton por supreniri la turon kaj rigardu Parizon el la ĉielo.

10 Mojosaj Aferoj Por Fari En Japanio

Oktobro 18, 2009 at 12:45 atm | In Listoj, Vojaĝado | 7 Comments
Tags: karaokeo, japanio, sumoo, trajno, restoracio, akihabara, pachinko, hotelo, grimpado

Sendube indas viziti Japanion unufoje en la vivo, se ne plurfoje. Ne estas alia lando kiel ĝi – ne nur por ordinara turismumado, sed vere temas pri loko por resti, senti, ĝui la etoson. Jen nia listo:

10. Klopodu paroli la japanan lingvon

Ek, provu. Homoj ridetos aŭ ridegos, sed ĉiokaze vi ricevos amuzan reagon. Japanoj amas kiam eksterlandano klopodas paroli ilian lingvon – ne timu! Simple rigardu vian lernolibron kaj elektu demandon. Prave, vi tute ne komprenos tion, kion la homoj respondos, sed grace kapasertu kaj ili pensos ke vi komprenis.

9. Ĉeestu sumoan turniron

Homoj ofte kredas ke sumoo estas nur 2 dikemuloj luktante por unu tangao, sed jes, estas multe pli. Spektu turniron kaj sentu la elektran etoson dum vi malkovras ĝian pompan ceremonion. Subite vi apogos vian plej ŝatatan batalanton ĝis la fina venko.

8. Kantu karaokean kanzonon

En Japanio kaj FESTO (aliĝu!), karaokeo estas daŭre populara (kiam ĉiam). Geamikoj pasas horojn ĉe etaj ĉambroj kun mikrofonoj ĉemane, grandaj kantolibroj kaj laŭtaj paroliloj. Estas kantoj en ĉiuj lingvoj — novaj kaj oldaj — do elektu vian numeron, inspiriĝu kaj kantu vian sorton. Ne gravas ĉu vi sonos kiel kato en lavmaŝino, viaj amikoj daŭre amos vin.

7. Rajdu la kuglan trajnon

La shinkansen portas homojn ĉien ajn ekde 1964 je rapidecoj de 300km/h (186 mph, Usonanoj!). Komforta, vi ne volos forlasi la vagonon. Admiru la tempo-precizecon ankaŭ — via trajno alvenos al la haltejo je la ĝusta sekundo.

6. Manĝu ĉe rimena suŝio-restoracio

Via vespermanĝo trairos en malrapide movanta rimeno. Kion preni, ĉu maki, suŝion aŭ tempura? Ne forgesu okulumi la kuiriston, dum li malabarisme tranĉas fiŝojn en la apuda malferma kuirejo.

5. Perdiĝu en Akihabara

Se vi amas elektronikaĵojn kiel ni, vi amos tiun ĉi kvartalon meze de Tokio. Pluraj aparatoj neniam eliras el Japanio, do prenu ilin nun – eĉ se vi ne scias, al kio ĝi utilas…

4. Ludu pachinko-n kiel vera japano

Eble vi ne kredos, sed japanoj iras al pachinko por trankviliĝi. La brua ludejo estas tempopasigilo por multaj homoj; simple aĉetu kelkajn pilkojn por komenci. Se vi estas bonŝanca, vi gajnos pliajn pilkojn kaj povos ŝanĝi ilin por vera mono. Se vi estas malbonŝanca en la ludo, tio signifas sorto en la amo!

3. Tranoktu en iu amo-hotelo

Se vi estas en Japanio kun via alia duono, meritas la penon pasigi iom da tempo ĉe tiuspecaj lokoj. La konstruaĵoj ofte havas mirigajn stilojn – kaj aliaj eĉ ludilojn, gigantajn televidilojn, la Wii aŭ karaokeajn maŝinojn, krom amuzaj speguloj en la plafono kaj diskejaj lumoj.

2. Baniĝu nuda kun viaj nekonataj amikoj

Se vi sin duŝas sola, ĉe via hotela ĉambro, vi ne korekte japanas. Do vestu tiun vestaĵon, kiun vi uzis ĉe via naskiĝo (t.e. nuda!) kaj ek al la onsen. Sed atentu, ĉar la banejoj havas malsamajn temperaturojn – de frosto al brulo.

1. Grimpu la monton Fuji

Sonas freneze, ĉu ne? Sed la plej alta monto de la lando (3776 m) estas tute surgrimpebla. Jes, vi devas esti bonsana, sed miloj da homoj faras ĝuste tion: supreniri kaj ĝui neforgeseblan pejzaĝon.

Ĉu Estas Limoj Por Amo?

Oktobro 5, 2009 at 9:37 ptm | In Filmoj, Vojaĝado | Leave a Comment
Tags: Carlo Pisani, lovetrips, The European Cultural Foundation

La respondon ni trovos Somere 2010 ĉe kelkaj filmfestivaloj, kie spekteblos dokumentario Lovetrips (amvojaĝoj). Itala reĝisoro Carlo Pisani, kiu enamiĝis en Svislandino antaŭ 9 jaroj kaj venkis monkonkurson de Eŭropa Kultura Fondo, nun estas preparanta filmadon pri malproksimaj enamiĝintoj kaj diversaj spertoj kiuj ekas en ĉi-specaj rilatoj.

lovetrips

Ĝis la 30a de novembro oni serĉas homojn, kiuj vivas internacian amrilaton ene de EU. Simple aliĝu al la projekto – post 4 semajnoj vi scios ĉu oni elektis vin kaj vian kunul(in)on por filmado. Aĝo, sekso kaj nacieco ene de Eŭrop-Unio ne gravas. Nek gravas bone paroli la anglan, ĉar oni rajtos rakonti sian amhistorion en la denaska lingvo.

Esploru Antikvan Romon Per Google Earth

Novembro 12, 2008 at 7:01 ptm | In Arkitekturo, Teknologio, Vojaĝado | Leave a Comment
Tags: 3D, google earth, roma

Per la magio de Google Earth vi nun povas vojaĝi reen en la tempo por vidi kiel aspekti Antikva Romo kaj ĝia tuta arkitekturo en 3D. La programo estis disvolvigita fare de Rome Reborn Project, projekto kiu celas rekonstrui (virtuale) version de Romo el la jaro 320 AD – la pinta momento de la imperia ĉefurbo. Por ĝui ĝin laŭplaĉe, vizitu la paĝaron Google Earth: Rome. Kelkaj detaloj ankoraŭ ne pretas sed, hej, Romo ne estis konstruita en unu sola tago!

Goplanit Planos La Vojaĝon Por Vi

Novembro 2, 2008 at 6:25 ptm | In Teknologio, Vojaĝado | Leave a Comment
Tags: goplanit, socia reto, web20

Reta planilo GoPlanit klopodas solvi la tedan labor-parton de vojaĝado – itinera planado – kaj aldoni al ĝi socian elementon. Ekzemple: vi volas iri al San Francisco, sed tute ne scias kion fari. Perfekte! Post aliĝi al la servo kaj elekti la koncernan urbon, GoPlanit provizas bazan itineron, kiun vi ĝustigos laŭ propraj interesoj kaj buĝeto. Alia ebleco: vi JAM havas kelkajn aferojn por fari tie, sed ankaŭ iom da libera tempo; voilà, jen lerta funkcio por “plenigi la mankojn”, kiu sugestos amuzajn aferojn por fari intertempe de viaj aliaj devoj. GoPlanit ankaŭ subtenas moveblajn aparatojn (iPhone!) kaj inkluzivas ilon por mikroblogi viajn kuraĝajn aventurojn.

Aviadilos? Kunportu Ĉion En Unu (Man-)Pakaĵo

Oktobro 29, 2008 at 1:39 ptm | In Kiel, Vojaĝado | 4 Comments
Tags: brendan lewis, klaku, manpakaĵo

Nia skipano Chuck Smith kaj Klaku.net rekomendas ĉisemajne videon nomata “Kiel Kunporti Ĉion Kion Vi Volas En Via Manpakaĵo“. La kreinto de la amuza filmeto, elektronika inĝeniero kaj teknika tradukisto Brendan Lewis, sin nomas ‘globtrotulo’ kaj kreis propran blogon en pluraj lingvoj – inkluzive de Esperanto – por rakonti pri siaj tra-la-mondaj aventuroj.

VIDEO: Kiel Kunporti Ĉion Kion Vi Volas En Via Manpakaĵo

Kie Trovi Picon Kun Banano

Oktobro 2, 2008 at 2:15 ptm | In Manĝado, Vojaĝado | 4 Comments
Tags: charmaine wasif, pico

Denove mojosan oferton proponas Londono. En picejo Eco-Restaurant, dank’ al posedanto Charmaine Wasif, estis inventita serio de picoj, kreitaj por gravedaj virinoj, kiuj tre ofte kapriĉas pri manĝaĵoj kaj do bezonas la plej variajn menuojn. Enkadre de “Gravedec-picoj” oni proponas 7 focaccie (picaĵojn), kiujn tradiciemaj pic-manĝantoj neniam alproksimigus al buŝo. Ekzemple, picaĵo kun mozarella-fromaĝo kaj glaciaĵo; kun favoj aŭ vinberoj; freŝa salmono, laktaĵ-salso, bifsteko, semoj de sunfloroj…

PS: se iu leganto malsatas, jen la adreso: 144 Chiswick High Road, Chiswick

Komputila Dorsosako Farita El Neopreno

Septembro 15, 2008 at 11:49 atm | In Dizajno, Modo, Vojaĝado | 4 Comments
Tags: komputilo, new york, built, dorsosako, neopreno

Novjorka industria dizajna kompanio Built proponas tiun ĉi neoprenan dorsosakon por via tekkomputilo. La ĉefa kupeo entenas (kaj protektas) komputerojn inter 12–17″, dum du aliaj poŝoj provizas spacon por aliaj aĵoj. La produktoj de Built estas vendataj en pli ol 30 landoj kaj vi povas aĉeti ilin en 4.000 vendejoj, interalie en MoMa (la muzeo pri moderna arto de New York). U$ 80.

Turistaj Mapoj El Popularaj Urboj

Septembro 13, 2008 at 12:51 ptm | In Vojaĝado | 1 Comment
Tags: london, mapo, onionmap, turismo

Retejo OnionMap gastigas interaktivajn, alt-kvalitajn turistajn mapojn el popularaj lokoj de la mondo. Ekde New York ĝis Tokyo, de San Francisco al London, OnionMap klopodas kunigi ordinarajn, paperajn mapojn kun la aspekto kaj rimedoj de interfaco similaj al Google Maps. Oni povas foliumi popularajn vidindaĵojn, trovi hotelon, elekti restoracion kaj ĝenerale orientiĝi en fremda urbo. Probable ĝi ne uzindas por organizi tutan vojaĝon, sed por ekkoni ĉefajn turismajn vidindaĵojn OnionMap taŭgas.

Nova Muzeo Volas Halti La Tempon

Aŭgusto 27, 2008 at 2:09 ptm | In Vojaĝado | Leave a Comment
Tags: 11.09.2001, muzeo, new york, newsmuseum, pulitzer

Ĉu oni povas fermi en muzeo ian realecon en daŭra evoluo, ekzemple, infomadon? En Washington, apud Campidolium, malfermiĝis NewsMuseum (NovaĵMuzeo). Kreaĵo de Novjorkaj arkitektoj de Polshek Studio, ĝi aspektas kiel giganta 3-dimensia ĉiutag-gazeto. En ĝies 7 etaĵoj oni povas viziti la galerion kun ĉiuj fotoj- venkistoj de Pulitzer-premio aŭ ĉiuj fotoj memore la 11an de Septembro 2001, kun la ĉefpaĝoj de jurnaloj de la sekvanta mateno post la tragedio. En alia parto de la muzeo oni omaĝas 1800 ĵurnalistojn kiuj mortis “ĉe laboro” ekde 1837 – kaj ne mankas aŭtoj kun grataĵoj por montri minacojn de ĉi-metio. Ĉeestas ankaŭ infana zono kun kinejo kaj TV-studio, kie oni povas gustumi la emocion iĝi prezentanto por por unu tago.