Author Archives: musubana

Ĉapeloj!

Se vi ankoraŭ ne spektis la unuan animacian filmon en esperanto, krozu tuj al

http://vimeo.com/19185725

 

\(^_^)/

Fingra Maratono

Ĉu eblas verki dum unu monato romanon? Certe jes! (Ĉu ĝi legindos, jen alia afero…)

Dum kelkaj jaroj ekzistis freneza usona projekto NaNoWriMo – mallongigo de National Novel Writing Month, ”Nacia monato de romanverkado”. Spite al la nomo, ĝi jam internaciiĝis, kaj la ttt-ejo alireblas diverslingve (Esperante bedaŭrinde ne).

La koncepto simplas: Oni skribu dum novembro romanon de 50 mil vortoj, tio estas po 1667 vortoj tage. Post tiu tempo, oni rete sendu sian manuskripton al la organizintoj, kiuj kalkulas la vortojn per roboto. Ĉar ili ne legas la ricevitaĵojn, oni povas verki ajnalingve, eĉ la saman vorton 50 mil-foje.

Kial verki fuŝaĵon kiun neniu legos? Via jena bloginformanto aliĝis kun la espero akiri pli da spertoj pri verkado de longaj tekstoj. Mi ne kredis ke eblos, sed mi fakte nun rapide alproksimiĝas tiun magian ciferon 50 mil…

Se vi ŝatus partopreni, krozu jam al http://nanowrimo.org/ kaj prepariĝu por novembro 2011…En aprilo okazos simila projekto pri scenaroj, kie partopreneblas ankaŭ ope: http://www.scriptfrenzy.org/

Jen Nia Mondo Fota

Pluvarbaro. (Bildo el Flickr.)

Se vi ŝatas foti, aŭ se la Vikipedio tro tekstas por vi, jen bona novaĵo:

La Fotopedio (Fotopedia). La celo de la kolektiva projekto estas tutsimple … montri la tutan mondon per belaj fotoj!

Ĉiu povas kontribui. Nur necesas fotilo, kaj freŝaj okuloj…

Ĉu vi havas okulfrapan foton por ilustri la serĉvorton ”esperanto”?

Ĉu Remodiĝos Papero?

PocketMod: la papera iPhone

Imagu ke vi planas vojaĝon al sovaĝa naturejo en iu tropika lando…  Vi jam metis viajn specialajn botojn, pafilon kaj kontraŭserpentatakan ĉapon en vian valizon… Vi nun prenas vian plej amatan havaĵon – vian iPhone, por rigardi kiom horas, kiel veteras en via destinejo, kiuj personoj kontaktindas tie, kaj tiel plu. Subite frapas vin panika penso:

Kio okazos se vi, meze de la ĝangalo, perdos vian karan komunikilon? Se ĝi elglitos el via poŝo dum fortostreĉa montetogrimpo, se ŝtelos ĝin el via mano senhonta simio, se la pluvego dum tri tagonoktoj kaptos vin en insulo, kie ne eblas reŝargi vian ilon per via sunenergia reŝargilo?

En tiaj situacioj, kaj en aliaj kiam vi timas kunpreni vian iPhone, ekzistas brila solvo: papero.

Kaj se vi tro maldiligentas plani kajeron kun ĉiuj necesaj informoj, http://repocketmod.com proponas facilan solvon:

Simple eniru la retpaĝon, elektu kiajn paĝojn vi bezonas (ĉu por telefonlisto, ĉu por kalendaro, ĉu por notoj), kaj printu al papero! :-)

Poste sekvu la tre simplajn instrukciojn pri faldado. Havos vi nun tute poŝkonvenan informilon, kiu eĉ ne bezonas bateriojn.

Fanaj Filmoj Por Senpaciencaj Hobitoj

Ne nur Gerda malaperis…

Se la Granda Evento de via vivo en la jaroj 2001, 2002 kaj 2003 estis la kinigo de ”La Mastro de la Ringoj”…   Se vi ĉiutage atendegas la ontan filmon ”La Hobito”…  Jen bona novaĵo por vi! Kelkaj fanoj de la Angla fantasta aŭtoro Tolkien tiel sopiris al lia mondo Meztero ke ili produktis siajn proprajn filmojn. Nome:

The Hunt for Gollum – ”La ĉaso je Gollum” (anglalingva kun diverslingvaj subtitoloj; rete spektebla; daŭras 38 minutojn)

Born of Hope – ”Esper-naskita” (anglalingva kun diverslingvaj subtitoloj; rete spektebla; daŭras 70 minutojn)

Ambaŭ antaŭas la okazojn de La Mastro. Ili baziĝas je aferoj kiujn Tolkien mem skizis fine de tiu verko.

En The hunt for Gollum Aragorn serĉas la hobitaĉon Gollum tra sovaĝaj pejzaĝoj (filmitaj en norda Kimrujo). La sorĉisto Gandalf eksuspektis ke la senvidebliga ringo (havata de la hobito Bilbo) estas pli ol truk-ludilo… Pro tio ĝia eksa posedanto Gollum trovendas je ĉioma kosto!

Born of Hope temas pri la gepatroj de Aragorn kaj la antaŭhistorio de Aragorn mem.

Ambaŭ filmojn kreis pasiaj amatoroj, akirante mirindajn rezultojn per buĝetetoj, strebego kaj interreta kunlaborado.

Na Born of Hope kreis la Brita amatora aktorino Kate Madison, kiu per sia ŝparmono produktis antaŭfilmeton… Alŝutinte tiun en YouTube, ŝi sukcesis altiri sufiĉe da tutmondaj atento, mono kaj alispeca helpo por finfari la filmon! (Se vi legas la Hispanan, vidu jene.)

Kial atendi? Iru ni Mezteren! :-)

(Klaku la suprajn ligilojn de la filmoj por ekspekti ilin.)

Kate Madison, la reĝisoro de Born of Hope

Kiom Da Retadresaj Kurtigiloj Bezonas Esperantulo?

Ĉu vi emas mallongigi retadresojn?

Multaj retadresoj longegas kaj kreas kaoson en retmesaĝoj kaj babilejoj. Retadresa kurtigilo estas speciala retpaĝo per kiu oni povas krei alternativan adreseton por iu ajn paĝo. La plej konata kurtigilo estas http://tinyurl.com/.

Sed kial tiom da literoj?

La kurtigilo http://u.nu/ maksimume minimumas – eĉ per bela Esperanta vorto! B-)

Ekzemplo: La adreso http://u.nu/4hyw4 kondukas al tiu ĉi blogero.

Utile Forigu La Eksteran Mondon Per – La Sunenergia Kurteno!

Ni jam priparolis por vi la nekredeblan futuron de sendrata elektro. Dum ni atendas tiun tagon kiam kabloj ne plu bezonatos kaj la verda energio libere kaj ĝustacele ondumos tra la aero, ne mankas kreivaj solvoj al la energia problemo per pli establitaj teknologioj.

Dizajnisto Ming-Ching Hsueh kreis la sunenergian kurtenon. La ilo genie simplas:

Kiam sunas, simple malvolvu la kurtenan rulon antaŭ iun taŭgan fenestron. (Vi ne bezonas sunon ĉe via komputiltablo, ĉu?) La streĉita kurteno nun kaptos la sunradiojn, kaj stokos ilin kiel baterian elektron. Poste, dum la nigra nokto, vi povos ŝargi ĉiujn viajn maŝinetojn (poŝtelefonon, razilon ktp.) per la diversaj kabloenirejoj de la kurtena baterio. Brile, ĉu ne? :-)

Pli da bildoj vidu je: http://www.yankodesign.com/2009/10/01/sun-shine-and-a-curtain/

Financa Krizo: Mmm…

Kiu dum malfacilaj tempoj ne emis iomete konsoli sin per dolĉaĵoj? Ĉu ĉi ĉokolado je formo de pica diagramo reestigos ĉaĉaĉaon en la vivo de borsofiaskinto, la Mojose-teamo ne scias – sed kia bongusta ideo! :-)

La belaĵon kreis Kataluna ĉokoladofirmao Chocolat Factory. La foton oni… pruntis el la Hispana gazeto El País.

Sendrata Elektro

Imagu vivon sen kabloj! Ke la elektro por via poŝtelefono ĉiam traflugus la aeron, same kiel radiaj aŭ interretaj ondoj…

Nu, la sendrata futuro baldaŭ nunos:

Laŭ la Dana retgazeto comon.dk ( http://is.gd/3ANbE ), la firmao Witricity (el Wireless Electricity – sendrata elektro) jam konstruis provtipon de sendrata elektro! La scienciston Eric Giler tiel ĝenis la baterimalpleneca sonsignalo de la poŝtelefono de lia edzino, ke li komencis teoriumi kiel sen kablo transsendi elektron.

Demonstron vidu jene:

Kvankam Eric Giler certigas ke la sendrata elektro tute sendanĝeras, mi ne povis ne komenti la nove brilan futuron per la sekva desegnaĵo. B-)

– Fek, tro forta kurento…

– Fek, tro forta kurento…

Memore Al Mojosulo

En Esperantujo ne facilis esti fano de Michael Jackson (1958–2009). Homoj ofte negative reagis. Eble ĉar li kantis per la Angla. Eble ĉar ili vidis nur lian vizaĝon.

Per siaj videoj kaj muziko, Michael Jackson kundifinis mojosecon en la jaroj 1980aj kaj 1990aj. Tial li meritas mencion en Mojose.

~B–O

Ĉu vi sciis ke li estis fervora libroleganto ( http://is.gd/1hoDh )? Kaj ke li prisciis Espon? Tion montras la enkonduka parolado al la reklamfilmo por ”HIStory” ( http://is.gd/1hoTy ).

Kiel Mojose-teamano, mi volas honori ĉi genian muzikisto-danciston per mia malnova (jam aliloke aperinta) traduko de la teksto de ”Liberian Girl” (interesa por lingvuloj pro la svahilaĵo!) Popteksto sen melodio ĉiam aspektas strange, do prefere vi aŭskultu ankaŭ la muzikon – ekzemple je http://fizy.com/.

LIBERIANIN’

Naku penda piya – naku taka piya – mpenziwe

[Ankaŭ mi amas vin – ankaŭ mi volas vin – mia kara]

Liberianin’…
Vi venis kaj venkis min
Abrupta pasi’
Liberianin’…
Konkeris la koron, in’
Sincer-emoci’

Liberianin’
Vi scias ke venis
Venkonte min,
Samkiel en filmoj
Kiam geamantas du
Kaj ŝi flustras al li ”ĉu
Vi min amas?” kaj li plu…
”Mi amas vin, Liberjanin’”

Naku penda piya – naku taka piya – mpenziwe

Liberianin’
Pli fajna ol ajna gem’
Koramo el vi
Liberianin’…
Vi kisas min,
Ho, destin’
Ke faras vi ĉi

Liberianin’
Vi scias ke venis
Venkonte min,
Samkiel en filmoj
Kiam geamantas du
Kaj ŝi flustras al li ”ĉu
Vi min amas?” kaj li plu…
”Mi amas vin, Liberjanin’”

Naku penda piya – naku taka piya – mpenziwe

Liberianin’
Vi scias ke venis
Venkonte min,
Atendas mi tagon
Kiam diros vi „ho jes!“
Kaj mi same kun ridet’
Kaj ĉiamos la konfes’

Mi amas vin, Liberjanin’, je etern’
(In’)
Mi amas vin, Liberjanin’, je etern’
(In’)
Mi amas vin, Liberjanin’, je etern’
(In’)
Mi amas vin, Liberjanin’, je etern’
(In’)
Mi amas vin
Mi amas vin kara
(In’)
Mi volas vin
Mi amas vin kara
(In’)
Hu! Mi amas vin kara, mi volas vin kara, hu!
(In’)

[Esperantigis musubana laŭ originalo de Michael Jackson – ©]
Follow

Get every new post delivered to your Inbox.